អង់គ្លេស៖ នាយករដ្ឋមន្រ្តីអង់គ្លេស លោក Borris Jonhson កំពុងសម្តែងការព្រួយបារម្ភ ថាទំនងជានឹងអាចបន្តការបិទខ្ទប់បន្ថែមរយៈពេល ១ខែទៀតនៅក្នុងប្រទេស ខណៈប្រទេសនេះគ្រោងនឹងបញ្ចប់ការបិទខ្ទប់ទាំងស្រុងនាថ្ងៃទី២១ ខែមិថុនាខាងមុខ។ គោលបំណងនៃការបន្តបិទខ្ទប់នេះ បន្ទាប់ពីរដ្ឋាភិបាលអង់គ្លេស កំពុងកត់សម្គាល់អត្រាកើនឡើងនៃអ្នកឆ្លងកូវីដ-១៩ថ្មី ដែលមានការចម្លងសាយភាយនៃប្រភេទវីរុស Delta។ ការសម្រេចនឹងត្រូវប្រកាសនាថ្ងៃចន្ទនេះ ខណៈប្រភពជាច្រើនដូចជា​ BBC, The Time និង The Sun សុទ្ធតែបានរាយការណ៍ដូចគ្នាថា ជម្រើសនៃការបិទខ្ទប់បន្តទំនងជានឹងត្រូវជ្រើសយកដោយជៀសមិនបាន។

ប្រសិនបើរដ្ឋាភិបាលសម្រេចអនុវត្តប្រកាសបញ្ចប់ការបិទខ្ទប់នេះ ក្លិបរាត្រី សកម្មភាពសម្តែងទាំងឡាយ អាពាហ៍ពិពាហ៍ រួមទាំងសកម្មភាពរស់នៅប្រចាំថ្ងៃផ្សេងៗទៀត នឹងលែងស្ថិតក្រោមការហាមប្រាម ព្រមទាំងត្រូវបានត្រឡប់វិលមកភាពប្រក្រតីឡើងវិញ។ យ៉ាងណាក្តី នាយករដ្ឋមន្រ្តីអង់គ្លេស លោកក៏បានបង្ហាញពីសម្ពាធណាស់ដែរក្នុងការពិចារណាបន្តបិទខ្ទប់នេះ ស្របពេលដែលសមាគមវេជ្ជសាស្រ្តអង់គ្លេស ក៏នឹងត្រូវបានអញ្ជើញសម្រាប់ការប្រជុំពិចារណាលើសេចក្តីសម្រេចនេះដែរ។

គួរបញ្ជាក់ថា មកដល់ពេលនេះការឆ្លងថ្មីនៃវីរុសកូវីដ-១៩ ក្នុងចក្រភពអង់គ្លេស ត្រូវបានគេរកឃើញ ៩ ក្នុងចំណោម ១០ គឺជាប្រភេទវ៉ារ្យ៉ង់ Delta ដែលបានរកឃើញដំបូងក្នុងប្រទេសឥណ្ឌា។ យ៉ាងណាក៏ដោយ ប្រភពដដែលបានបញ្ជាក់ថា អ្នកឆ្លងស្ទើរតែ ២ភាគ៣ នៃវ៉ារ្យ៉ង Delta នោះ ពុំទាន់បានទទួលការចាក់វ៉ាក់សាំងនោះទេ មានន័យថាប្រជាជនពេញវ័យរបស់អង់គ្លេសដែលទទួលបានវ៉ាក់សាំងរួចជាងពាក់កណ្តាល ឬប្រមាណជា ២៩លាននាក់នោះ ហាក់មានសុវត្ថិភាពខ្ពស់ និងជៀសផុតពីវីរុស COVID-19៕